अनिल कुमार कुश्मी
असार ३०/धनगढी,
धनगढी उप–महानगरपालिका वडा नं. ७ मोतिचोकमे रहल किङ्ग मोसन डान्स क्लव, श्री सर्वोदय माध्यमिक विद्यालय धनगढी–१४ सी गाउँ कैलालीके अंगनामे वृक्षरोपण कर्ले बा। किङ्ग मोसन डान्स क्लवके आयोजनामे रोहित एण्ड किरण ईलेक्ट्रोनिक्स बुद्ध चोक धनगढी, सि. यस. ईलेक्ट्रोनिक्स बसपार्क धनगढी, माया फेन्सी बुद्धचोक धनगढी, रोहित मेडिकल धनगढी, बि. आर. ईलेक्ट्रोनिक्स बुद्धचोक धनगढी, हर्षिता कन्सलटेन्सी मित्रनगर धनगढी, सुजिल एक्सरे धनगढीके सहकार्य ओ समन्वयमे वृक्षरोपण करगील हो।
वातावरण हराभरा ओ स्वच्छ बनैना सोचसे कर्गील वृक्षरोपणमे आम, लिची, कग्डी, अमरुट, सुपारी, अनार, अशोक, रबर प्लान्ट, रटरानी जैसिन लगभग १०० ठो मेरमेरके रुखुवक टेलुवा लगागिल हो।
मनै स्वस्थ हुईक लग शारीरिक कसरतके संग संगे वातावरण फेन हराभरा स्वच्छ हुई पर्ना जरुरी रहल कहटी वृक्षरोपण करल कहिके किङ्ग मोसन डान्स क्लवके संचालक तथा चलचित्र निर्देशक आदर्श महतो बटैनै।
नमुना विद्यालय बनैना अभियान चल्टी रहल बेर ऐसिक आके वृक्षरोपण करके बर्वार सहयोग करल कहिके श्री सर्वोदय माध्यमिक विद्यालयके प्रधानध्यापक जीतबहादुर चौधरी बटैनै। महतो हे कदरपत्र ओ मैयक चिन्हा डेटी, विद्यालय व्यवस्थापन समितिके अध्यक्ष जगदिश चौधरी फेन खुशी व्यक्त कर्नै।
