जेठ १७,
जोशीपुर गाउँपालिका अन्तरगतके गुरुवा, बैडावा तथा सोर्हिनिया समाजके आयोजनामे धुरिया पुजा भव्य रुपसे कैगिल बा। गुरुवा सुवर्ण चौधरीके घरगोस्याई, जोशीपुर गाउँपालिका वडा नं. ४ के वडा अध्यक्ष रामजनम चौधरीके बर्का पहुनाही ओ वडा नं. २ के अध्यक्ष विष्णु प्रसाद डंगौराके खास महुनाहीमे जोशीपुर २ बरगढीमे सांस्कृतिक नाचगान सहित परम्परागत शैलीमे पुजा कैगिल हो ।
किसान हुक्रनके पहिल बाली लगैना सिजन बर्खाके पहिले प्रत्येक वरष अन्नबालीहे किराकाँटी, गाँधीगुजी ओ दैविक प्रकोपसे सुरक्षित राखेक लग धुरिया पुजा कैजिना गुरुवा छोटेलाल चौधरी बटैलै । परम्परागत रुपसे कैति आईल हेररी पुजा, लवाङ्गी पुजा ओ धुरीया पुजा थारुनके मुख्य पुजाके रुपमे रहल फे वहाँ बटैलै । यि पुजासे अन्नवालीहे किराकाँटी नोक्सान नैपुगैना ओ बालीमे मजा दाना लग्ना परम्परागत मौलिक मान्यता बा ।
यि पुजामे केक्रो घरेम् कौनो किसिमके दैविक समस्या बा, कौनो मनैन्मे लागलगोहर बा या केक्रो खेत्वामे उब्जनीके समस्या बा कलेसे गुरुवा केसौकनसे गुरै हेरैना परम्परागत मौलिक मान्यता फे बा ।
कार्यक्रममे गुरुवा हुक्रे नच्ना मुंग्रहुवा नाच प्रस्तुत कैगिल सँगे उमेरमे सब्से छोट गुरुवा वर्ष ११ के अजय चौधरी ओ जेष्ठ गुरुवा भागमल चौधरीहे सम्मान पत्रलैके सम्मान कैगिल ।
थारु समाजमे कैजिना ३ ठो महत्वपूर्ण बर्का पूजाहे संरक्षण ओ निरन्तरता डेना जरुरी रहल प्रमुख अतिथि रामजनम चौधरी के कहाई रहे । सामाजिक मूल्य मान्यता अनुसार समाजके महत्वपूर्ण अंग कलेक गुरुवा, बैडावा, सोर्हिनिया फे होई । वहाँ हुक्रन ठे हुईल ज्ञानगुन पुस्तान्तरण कैना जरुरी रहल फे वहाँ बटैलै ।
ओस्टेके कार्यक्रमके विशिष्ट अतिथि जोशीपुर गाउँपालिका २ नं. वडा अध्यक्ष विष्णु प्रसाद डंगौरा गुरुवा हुक्रनके पुजा कैना ठाउँ संरक्षण ओ व्यवस्थीत कैना आवश्यक रहल बटैलै । वहाँ कलै धुरीया पुजा कैना ठाउँमे एक ठो बम्मा ओ ट्रस बनाईक लग बजेट विनियोजित कैगिलबा जल्डी बनी ।
