राजु चौधरी
धनगढी, २४ भदौ । राष्ट्रिय थारु कलाकार मञ्च सुदुरपश्चिम प्रदेशके पहिल अधिवेशन भब्य रुपसे सम्पन्न हुइल बा ।
कञ्चनपुरके कृष्णापुर नगरपालिका वडा नं. ६ सिंहपुरमे सम्पन्न अधिवेशनमे सर्वसहमतसे नयाँ कार्यसमिति चयन करले बा ।
समितिके अध्यक्षमे संगत थारु, उपाध्यक्षमे समु चौधरी, सचिवमे स्वरुप चौधरी, सह–सचिवमे शिसा चौधरी, कोषाध्यक्षमे राज चौधरी रहल बटै । ओस्टेक करके सदस्यमे सुयोग चौधरी, आशिष चौधरी, मनिराम चौधरी, नेहेल्जा चौधरी, सदिच्छा चौधरी, आदर्श महतो चयन हुइल बटै ।
ओस्टेक करके अधिवेशनके अवसरमे टमान क्षेत्रमे योगदान पुगाइल छ जनहनहे मञ्चसे सम्मान करगिल रहे । थारु महानायक प्रेम चौधरी, गायिका समिक्षा चौधरी, गितकार सुबेश कठरिया, छायांकार साहिल चौधरी, मिडियाकर्मी अनिल कुस्मी, गायक नारायण राना कार्यक्रममे सम्मानित हुईल रहैं ।
राष्ट्रिय थारु कलाकार मञ्च सुदुरपश्चिम प्रदेशके पहिल अधिवेशनके वर्का पहुना प्रतिनिधिसभा सदस्य माननीय अरुण चौधरी ओ खास पहुना कृष्णापुर नगरपालिकाके नगर उपप्रमुख द्रोपती राना लगायतके बक्ता हुक्रे कला ओ गायन क्षेत्रसे थारु समुदायके पहिचान, संस्कृति ओ भाषाके संरक्षण सम्बद्र्धनमे टेवा पुगाइल बटैलै ।
मञ्चके प्रदेश अध्यक्ष संगत थारुके अध्यक्षतामे हुइल कार्यक्रमके सञ्चालन अनिल कुस्मी करले रहिट । कार्यक्रममे विशिष्ट पहुना राष्ट्रिय थारु कलाकार मञ्चके अध्यक्ष विनय बैद्य टमान गायन तथा कला क्षेत्रके गायक ओ कलाकारहुकनके सहभागिता रहल रहे ।