अगहन २५,
कैलालीके जोशीपुरमे लैंगिक हिंसा विरुद्धके १६ दिने अभियान सम्पन्न हुईल बा । कार्यपालिका सदस्य सरस्वती चौधरीके घरगोस्याही ओ जोशीपुर गाउँपालिकाके निमित्त प्रमुख प्रशासकिय अधिकृत मिनराज कठरियाके बर्का पहुनाहीमे कार्यक्रम सम्पन्न हुईल । नोभेम्बर २५ से लैके डिसेम्बर १० समके १६ दिनके अभियान जोशीपुर गाउँपालिकाके सक्कु वडामे तमाम कार्यक्रम कैगिल रहे ।
लैंगिक हिंसा कना महिला विशेष हुक्रनकेल फोकस नै कर्के पुरुष हुक्रहनफे फोकस कर्ना आवश्यक रहल बाल कल्याण संघ टिकापुर कि दुर्गा तिमिल्सेना बतैली । कोई महिला पुरुषसे पिडित रथै कोई पुरुष महिलासे पिडित रथै वहे कारणसे अईसिन कार्यक्रममे महिला पुरुष दुनुजाने सहभागिता हुईना मजा रहल फे वहाँ बतैलै ।
ओस्तेके कार्यक्रम हे सम्बोधन कर्ति महिला पुरुष विच हुईना हिंसात्मक गतिविधिहे न्यूनिकरण करेकलाग यि कार्यक्रमके महत्वपूर्ण भुमिका रहल बर्का पहुना मिनराज कठरिया बतैलै । लैंगिक हिंसा न्यूनिकरणके लग आपही स्वयम् से सुरुवात करेपर्ना फे वहा बतैलै ।