असार ३१,
कैलालीको जोशीपुर गाउँपालिकाले मिति २०८१ साल असार २१ गते एमबुलेन्स सञ्चालनका लागि एम्बुलेन्स चालकको आवश्यकताको विज्ञापन सम्बन्धि सूचना प्रकाशित गरेको थियो । एम्बुलेन्स चालक संख्या १ को पदपुर्ति गर्न गरिएको कर्मचारी करारमा लिने सम्बन्धि सूचनाको आधारमा दरखास्त दिएका उमेद्वारहरु मध्य प्रारम्भिक वर्णानुक्रम अनुसार छोटो सूचिमा ७ जनाको नाम प्रकाशित भएको थियो । असार २८ गते पालिकाले उमेद्वारहरुको लिखित, प्रयोगात्मक र अन्तरवार्ताका लागि उतिर्ण भएको व्यहोरा जानकारी गराउँदै अनिल कुमार चौधरी, प्रवेश चौधरी र भिमलाल चौधरी गरि ३ जनाको नाम प्रकाशित गरेको थियो । परिक्षामा उमेद्वारको प्रयोगात्मक, अन्तरवार्ता र लिखित परिक्षाको प्राप्ताङ्कको आधारमा योग्यता कायम हुन आएका ३ जना मध्य प्रवेश कुमार चौधरी सिफारिस योग्यताक्रममा छनौट भएका थिए भने अनिल कुमार चौधरी बैकल्पिक योग्यताक्रममा छनौट भए र भिम लाल चौधरी आउट भएको सूचना गा.पा.ले प्रकाशित गरेको थियो ।
करार सम्झौता नहुदै एक्कासी गा.पा.ले परिक्षा नजिता रद्द सम्बन्धमा असार ३१ गते सूचना प्रकाशित गरेको छ । एम्बुलेन्स चालक परिक्षामा सफल परिक्षार्थीले नियुक्ति लिंदाका बखत परिक्षाको सूचनामा तोकिएको न्यूनतम योग्यता र सक्कल कागजात फरक परेको देखिएको भन्दै योग्यताक्रममा फरक पर्न गई सम्पूर्ण परिक्षा नै प्रभावित हुन सक्ने सूचना प्रकाशित गर्दै गा.पा.को एम्बुन्स चालकको सम्पूर्ण परिक्षा नजिता रद्द गरेको हो ।
प्रवेश चौधरी (वडा अध्यक्षका छोरा) लाई योग्यताक्रममा छनौट गरिएपछि उनले पेश गरेको कागजात संकास्पद भएको हल्ला बजार तथा गाउँमा फैलियो र यथार्थ बुझ्नका लागि जोशीपुरका विभिन्न राजनितिक दल र यूवा सञ्जाल जोशीपुरका जिम्मेवार यूवाहरु पालिका पुगेका हुन् । परिक्षा दिनु पूर्व नै कागजातहरुको चेकजाँच हुनु पर्नेमा किन भएन ? यो सव सेटिङ्गमा भईरहेको छ भन्दै उनिहरु पालिका पुगेको थिए । निश्पक्ष रुपमा योग्यता तथा क्षमता पुगेको उमेद्वारले नै एम्बुलेन्स चालक हुनु पर्छ भन्ने माग उनिहरुको थियो । स्वास्थ्य जस्तो सम्बेदनशिल क्षेत्रमा समेत गा.पा.ले लापर्वाही गरिरहेको भन्दै उनिहरुले आपत्ती जनाएका थिए ।
