असार २५,
माध्यमिक शिक्षा परीक्षा एसइई के नतिजा विफेक रोज सार्वजनिक हुईल । जोशीपुर गाउँपालिका भित्तरके सामुदायिक विद्यालयमे सुधार देखापरल बा । संस्थागत स्कुलके तुलनामे सामुदायिक स्कुलफे प्रतिष्पर्धामे बा । २०७९ सालके एस.ई.ई. के नतिजा अनुसार जोशीपुरके ४ थो स्कुलके विद्यार्थीहुक्रे ३ प्लस जि.पि.ए. नानके पास हुईल बटै । जेम्ने रघुनाथ आदर्श प्राविधिक स्कुलके छात्र भोजराज जोशी ३.७६ जि.पि.ए. नानके पालिका टपर हुईल बटैं । दोस्रोमे उहे स्कुलके छात्रा पुजा चन्द ३.७२ जि.पि.ए. नन्लै ओ संस्थागत स्कुल ओर जोशीपुर हेवन गार्डन बोर्डिङ स्कुलके विद्यार्थीहुक्रे आदर्श चौधरी ३.७०, आदर्श वली ३.७० ओ प्रशान्त जोशी ३.७० जि.पि.ए. नानके पास हुईल बटै ।
ओस्तेके जनप्रकाश माध्यमिक विद्यालय मुद्धिके विद्यार्थीहुक्रे फे तमान जाने ३ जि.पि.ए. प्लस नन्ले बतै । जनप्रकाश मा.विा.के विद्यार्थी अनिष बम ३.४, अमित कठरिया ३.३ ओ अमर कठायत ३.१५ जि.पि.ए. नन्ले बतै । कलेसे मोहन्याल माध्यमिक विद्यालय बडहरिया जोशीपुरके सिखर साउँद ३.३ जि.पि.ए. नानके स्कुलके गौरव बढैलै ।
समग्रमे सामुदायिक स्कुल रघुनाथ आदर्श प्राविधिक स्कुलमे १० जाने, जनप्रकाश मा.वि.मे ३ जाने, मोहन्याल मा.वि.मे १ जाने ३ प्लस जि.पि.ए. नन्लेबटै ओ संस्थागत विद्यालय ओर जोशीपुर हेवनगार्डेन बोर्डिङ्ग स्कुलके १८ जाने ३ प्लस जि.पि.ए. नानके पास हुईल हुईल जोशीपुर गाउँपालिका शिक्षा शाखा जानकारी देहल ।